NIDA yatangaza kusitisha matumizi ya namba za vitambulisho kwa wasiovichukua kufikia Mei Mosi, 2025.

-


Na Fidea Masunga, Dar es Salaaam

Mamlaka ya Vitambulisho vya Taifa (NIDA) imetangaza kuwa kuanzia Mei Mosi, 2025, itasitisha matumizi ya namba za vitambulisho kwa wananchi waliotumiwa ujumbe wa kuchukua vitambulisho vyao lakini hawajajitokeza kuvichukua.


Hatua hiyo inalenga kuimarisha uwajibikaji na kuhakikisha vitambulisho vinatolewa kwa walio tayari kuvipokea, baada ya kubainika kuwa idadi kubwa ya wananchi hawakufika ofisini licha ya kutumiwa ujumbe mfupi wa maneno (SMS) kuwajulisha kwenda kuchukua vitambulisho vyao.



Akizungumza na waandishi wa habari jijini Dar es Salaam mapema April 14,2025 na Mkurugenzi Mkuu wa NIDA, James Kaji ambapo alisema kuwa kati ya wananchi 1,880,608 waliotumiwa SMS kati ya Januari na Machi 23, 2025, ni 565,876 pekee waliokwenda kuchukua vitambulisho hivyo, sawa na asilimia 30.



“NIDA imesikitishwa na mwitikio mdogo wa wananchi licha ya kufahamishwa rasmi. Hivyo, kuanzia Mei Mosi, tutasitisha matumizi ya namba kwa wale wote ambao hawajajitokeza,” alisema Kaji.



Kaji alibainisha kuwa tangu kuanza kwa zoezi hilo mapema Januari mwaka huu, jumla ya ujumbe 1,880,608 zilitumwa kwa waombaji, ikiwa ni sawa na asilimia 157 ya vitambulisho 1.2 milioni vilivyokuwa havijachukuliwa kutoka kwa ofisi za kata, vijiji na mitaa.



“Kati ya SMS hizo, 680,608 zilitumwa kwa waombaji wapya ambao vitambulisho vyao vimechapishwa na vinangojea kuchukuliwa,” alieleza Kaji.



Kwa mujibu wa Kaji, mfumo mpya wa utoaji vitambulisho unalenga kuongeza ufanisi kwa kuanzisha muda maalum wa kuchukua vitambulisho. 



Alisema baada ya kusajiliwa, mwombaji atapokea namba ya NIDA ndani ya siku tano, na ndani ya siku 21, atapokea ujumbe mwingine wa kumwelekeza mahali pa kuchukua kitambulisho na iwapo atashindwa kufanya hivyo ndani ya mwezi mmoja, namba yake ya NIDA itafutwa.



“Tunawahimiza wananchi kutunza ujumbe na kufika ofisini mapema ili kuepusha usumbufu na madhara ya kutopata huduma zinazotegemea kitambulisho hiki,” alisema.



Kaji alisema kuwa NIDA inatafakari uwezekano wa kuweka faini kwa wananchi watakaokaidi utaratibu huo, ikizingatiwa kuwa serikali inatumia rasilimali kubwa kutoa huduma hiyo bila malipo.



Aidha, aliwataka vijana wanaotimiza miaka 18 kuanza kujisajili mapema badala ya kungoja hadi wanapotafuta ajira, hali inayosababisha msongamano na migongano isiyo ya lazima kwenye ofisi za NIDA.



Kwa mujibu wa maelekezo ya Waziri mwenye dhamana, Kaji alisema kuwa kila ofisi ya NIDA nchini sasa itakuwa na afisa kutoka Idara ya Uhamiaji ili kurahisisha utoaji wa huduma kwa wananchi.



Kuhusu vitambulisho vilivyokuwa vimefutika, Kaji alisema serikali kupitia Ofisi ya Mwanasheria Mkuu imeanza kutoa vitambulisho vipya kwa wananchi waliokumbwa na changamoto hiyo. Alisisitiza umuhimu wa kujaza fomu kwa usahihi ili kuepuka makosa ya majina na taarifa nyingine muhimu.


Akizungumzia taarifa zinazosambaa mitandaoni kuwa NIDA inahusika na usajili wa bima ya Toto Afya Card, Kaji alikanusha madai hayo na kusisitiza kuwa NIDA haina jukumu lolote kwenye mpango huo wa bima.



Katika hatua nyingine, NIDA imetangaza kuanza kwa mpango wa utambuzi na usajili wa watu wote walio chini ya miaka 18, pamoja na raia wa kigeni wanaoingia nchini na kukaa zaidi ya miezi sita, ambao wote watapatiwa jamii namba.



Kwa mujibu wa mamlaka hiyo, zoezi hilo litaanza kwa majaribio katika wilaya za Kusini-Kusini (Unguja), Kilolo (Iringa) na Rungwe (Mbeya), ambapo zaidi ya watu 335,826 wanatarajiwa kufikiwa katika kipindi cha miezi miwili.



NIDA inasisitiza kuwa kuchukua kitambulisho cha Taifa ni haki na pia wajibu wa kila raia, kwani ndicho msingi wa kupata huduma muhimu kama vile benki, ajira, elimu, afya, mawasiliano na huduma nyingine za kijamii na kiuchumi.

Comments

Post a Comment

Popular posts from this blog

RC CHALAMILA AWATAKA WENYEVITI NA WATENDAJI KATA NA MITAA DAR KUSIMAMIA ULINZI NA USALAMA.

-
Image
Mkuu wa Mkoa wa Dar es alaam Mhe Albert Chalamila amewataka wenyeviti wa Serikali za mitaa pamoja na watendaji wa Kata Mitaa Mkoani humo kusimamia ulinzi na usalama kwenye ngazi ya mitaa na kata ili kuhakikisha Mkoa huo unakua Salama bila uwepo wa matukio ya uvunjifu wa amani wakati wote. Akizungumza leo jijini Dar es Salaam katika kikao kazi na Wenyeviti, Watendaji wa Kata na mitaa kilichofanyika kwenye ukumbi wa Diamomd Jubilee RC Chalamila amesema suala la ulinzi na usalama linapaswa kuanzia kwenye ngazi ya mitaa na kata hivyo amewataka viongozi hao wa mitaa kusimamia suala hilo kwani katika baadhi ya mitaa kumekua na matukio ya uvunjifu wa amani. RC Chalamila amewataka viongozi hao ngazi ya Mitaa na Kata kusaidia kutatua changamoto za wananchi na sio wao kuwa ni chanzo cha kuongeza changamoto kwa wananchi ambapo pia ametumia nafasi hiyo kuwataka wenyeviti na watendaji kutambua kuwa mwaka huu ni mwaka wa uchaguzi hivyo waendelee kuhimiza wananchi kuanzia ngazi ya mtaa kushiriki ucha...
Read more

MAHAFALI YA NANE SHULE YA AWALI NA MSINGI SAI YAFANA, WAZAZI WATAKIWA KULEA WATOTO KATIKA MISINGI YA MAADILI MEMA.

-
Image
Na Fidea Masunga,Dar es Salaam. Wazazi na walezi nchini wametakiwa kuhakikisha wanawalea watoto katika misingi ya maadili, nidhamu na hofu ya Mungu ili kujenga kizazi chenye kuzingatia elimu, kuishi maisha ya wema na kuwa viongozi bora wa kesho. Wito huo umetolewa jijini Dar es Salaam na mdau wa elimu  Ramadhan Balle , ambaye alikuwa mgeni rasmi katika mahafali ya nane ya  Shule ya Awali na Msingi Sai  yaliyofanyika Chanika Kidugalo Dar es salaam. Akizungumza kwenye hafla hiyo, Balle alisema malezi bora ya watoto hayapaswi kuishia nyumbani pekee, bali yazingatie misingi ya kiroho kupitia maandiko ya dini kama Biblia na Qur’ani, kwani ndiyo msingi wa kujenga jamii yenye hofu ya Mungu na kuondokana na vitendo vya ukatili na maovu. “Watoto wakilelewa katika msingi wa dini, wanakua na mwelekeo bora, wanajengeka kiakili na kiroho na hivyo kuepuka kujiingiza katika tabia hatarishi. Hili ni jukumu lenu wazazi na walezi,”  alisema Balle. Aidha, aliwataka wazazi kuwekeza zaid...
Read more