TMA, EMEDO WAZINDUA TUZO ZA WANAHABARI KUHAMASISHA ELIMU YA HALI YA HEWA.

-


Na Mwandishi Wetu

Mamlaka ya Hali ya Hewa Tanzania (TMA) kwa kushirikiana na Shirika la Usimamizi wa Mazingira na Maendeleo (EMEDO) wamezindua rasmi Tuzo za Waandishi wa Habari zinazolenga kuhamasisha elimu ya hali ya hewa, tahadhari za mapema pamoja na usalama majini nchini.

Akizungumza katika mkutano na waandishi wa habari uliofanyika Mbezi Garden jijini Dar es Salaam, Afisa Uchechemuzi wa EMEDO, Mary Francis Mahemba alisema vyombo vya habari vina mchango mkubwa katika kuelimisha jamii kuhusu changamoto za hali mbaya ya hewa na hatua za kujikinga dhidi ya majanga.

Alisema kupitia tuzo hizo, taasisi hizo zinalenga kutambua mchango wa wanahabari katika kusambaza taarifa sahihi zinazosaidia kuokoa maisha ya wananchi na kuongeza uelewa kuhusu usalama majini.

“Waandishi wa habari ni wadau muhimu katika kuhakikisha wananchi wanapata taarifa sahihi na kwa wakati kuhusu tahadhari za hali ya hewa, usalama majini na hatua za kujikinga dhidi ya majanga,” alisema Mahemba.

Kwa mujibu wa taarifa hiyo, tuzo hizo zitahusisha kazi za habari zinazohusu matukio ya hali mbaya ya hewa na athari zake kwa jamii, tahadhari za mapema za hali ya hewa, usalama wa usafiri majini, uzuiaji wa ajali za kuzama maji pamoja na ustahimilivu wa jamii dhidi ya majanga yanayotokana na mabadiliko ya tabianchi.

TMA na EMEDO zimesema tuzo hizo zitawahusisha waandishi kutoka redio, televisheni, magazeti, mitandao ya kijamii pamoja na majukwaa mbalimbali ya kidijitali nchini.

Waandishi wa habari wametakiwa kuwasilisha kazi zao zilizochapishwa au kurushwa hewani ndani ya kipindi cha kuanzia Agosti 1, 2025 hadi Agosti 30, 2026 kupitia barua pepe za media@meteo.go.tz na mediahaliyahewa@gmail.com.

Kwa upande wake, Meneja Masoko na Uhusiano wa TMA, Monica Mutoni alisema mamlaka hiyo itaendelea kushirikiana na wadau mbalimbali ili kuongeza thamani ya tuzo hizo na kuhamasisha matumizi ya taarifa za hali ya hewa katika shughuli za kijamii na kiuchumi.

Alisema taarifa za tahadhari za mapema zimeendelea kuwa nyenzo muhimu katika kuokoa maisha ya wananchi, hususan kwa jamii zinazotegemea shughuli za uvuvi na usafiri wa majini.

Ushirikiano huo kati ya TMA na EMEDO umetajwa kuwa sehemu ya juhudi za kuimarisha ushirikiano kati ya taasisi za umma, mashirika ya kiraia na vyombo vya habari katika kukuza uelewa na matumizi sahihi ya taarifa za hali ya hewa nchini.




Comments

Post a Comment

Popular posts from this blog

RC CHALAMILA AWATAKA WENYEVITI NA WATENDAJI KATA NA MITAA DAR KUSIMAMIA ULINZI NA USALAMA.

-
Image
Mkuu wa Mkoa wa Dar es alaam Mhe Albert Chalamila amewataka wenyeviti wa Serikali za mitaa pamoja na watendaji wa Kata Mitaa Mkoani humo kusimamia ulinzi na usalama kwenye ngazi ya mitaa na kata ili kuhakikisha Mkoa huo unakua Salama bila uwepo wa matukio ya uvunjifu wa amani wakati wote. Akizungumza leo jijini Dar es Salaam katika kikao kazi na Wenyeviti, Watendaji wa Kata na mitaa kilichofanyika kwenye ukumbi wa Diamomd Jubilee RC Chalamila amesema suala la ulinzi na usalama linapaswa kuanzia kwenye ngazi ya mitaa na kata hivyo amewataka viongozi hao wa mitaa kusimamia suala hilo kwani katika baadhi ya mitaa kumekua na matukio ya uvunjifu wa amani. RC Chalamila amewataka viongozi hao ngazi ya Mitaa na Kata kusaidia kutatua changamoto za wananchi na sio wao kuwa ni chanzo cha kuongeza changamoto kwa wananchi ambapo pia ametumia nafasi hiyo kuwataka wenyeviti na watendaji kutambua kuwa mwaka huu ni mwaka wa uchaguzi hivyo waendelee kuhimiza wananchi kuanzia ngazi ya mtaa kushiriki ucha...
Read more

MAHAFALI YA NANE SHULE YA AWALI NA MSINGI SAI YAFANA, WAZAZI WATAKIWA KULEA WATOTO KATIKA MISINGI YA MAADILI MEMA.

-
Image
Na Fidea Masunga,Dar es Salaam. Wazazi na walezi nchini wametakiwa kuhakikisha wanawalea watoto katika misingi ya maadili, nidhamu na hofu ya Mungu ili kujenga kizazi chenye kuzingatia elimu, kuishi maisha ya wema na kuwa viongozi bora wa kesho. Wito huo umetolewa jijini Dar es Salaam na mdau wa elimu  Ramadhan Balle , ambaye alikuwa mgeni rasmi katika mahafali ya nane ya  Shule ya Awali na Msingi Sai  yaliyofanyika Chanika Kidugalo Dar es salaam. Akizungumza kwenye hafla hiyo, Balle alisema malezi bora ya watoto hayapaswi kuishia nyumbani pekee, bali yazingatie misingi ya kiroho kupitia maandiko ya dini kama Biblia na Qur’ani, kwani ndiyo msingi wa kujenga jamii yenye hofu ya Mungu na kuondokana na vitendo vya ukatili na maovu. “Watoto wakilelewa katika msingi wa dini, wanakua na mwelekeo bora, wanajengeka kiakili na kiroho na hivyo kuepuka kujiingiza katika tabia hatarishi. Hili ni jukumu lenu wazazi na walezi,”  alisema Balle. Aidha, aliwataka wazazi kuwekeza zaid...
Read more