WCF YAWAJENGEA UWEZO WANAHABARI KUHUSU MFUMO WA FIDIA NA HAKI ZA WAFANYAKAZI.

-


MFUKO wa Fidia kwa Wafanyakazi (WCF) umeendelea kuimarisha utoaji wa elimu kuhusu haki za fidia kwa wafanyakazi kwa kuwapatia mafunzo waandishi wa habari, hatua inayolenga kuongeza uelewa wa masuala ya ulinzi wa kijamii na hifadhi ya jamii nchini.


Mafunzo hayo maalum yamefanyika jijini Dar es Salaam kwa ushirikiano wa Shirikisho la Vyama vya Wafanyakazi Tanzania (TUCTA) pamoja na Chama cha Waandishi wa Habari wanaofanya kazi katika Vyombo vya Habari Tanzania (JOWUTA).


Akizungumza katika ufunguzi wa mafunzo hayo, Rais wa TUCTA, Tumaini Nyamhokya alisema elimu hiyo ni muhimu katika kuwawezesha wanahabari kuelewa kwa kina masuala ya fidia kwa wafanyakazi ili waweze kuhabarisha jamii kwa usahihi zaidi.


Alisema WCF ni taasisi muhimu inayolinda wafanyakazi wanaopata madhila kazini ikiwemo ajali, magonjwa au vifo vinavyotokana na kazi zao, hivyo ipo haja ya jamii kupewa elimu ya kutosha kuhusu huduma zinazotolewa na mfuko huo.


Nyamhokya aliwataka waandishi wa habari kutumia taaluma yao kuelimisha wananchi kuhusu umuhimu wa kujiunga na mifuko ya hifadhi ya jamii pamoja na kuhakikisha waajiri wanatekeleza wajibu wao wa kuwasilisha michango na taarifa za matukio ya kazini kwa wakati.


Kwa upande wake, Mwenyekiti wa JOWUTA, Musa Juma Siwayombe alisema mafunzo hayo yamekuja wakati muafaka kutokana na changamoto zinazowakabili wanahabari wengi nchini, hususan ukosefu wa ajira za kudumu na mikataba isiyo rasmi katika baadhi ya vyombo vya habari.


Alisema hali hiyo imekuwa ikiwanyima wanahabari wengi fursa ya kupata ulinzi wa hifadhi ya jamii pamoja na haki nyingine muhimu za wafanyakazi.


“Wanahabari wanapaswa kuelewa haki zao za msingi ili waweze kujilinda na pia kuelimisha jamii kuhusu umuhimu wa mifumo ya fidia kwa wafanyakazi,” alisema Siwayombe.


Naye Mkuu wa Kitengo cha Mahusiano kwa Umma wa WCF, Raula Kunenge alisema taasisi hiyo itaendelea kushirikiana na wadau mbalimbali kuhakikisha wafanyakazi wanapata elimu sahihi kuhusu haki zao za fidia pamoja na huduma zinazotolewa na mfuko huo.


Kunenge alisema wanahabari wana nafasi kubwa ya kuifikisha elimu hiyo kwa jamii kupitia vyombo vya habari, hivyo ni muhimu kuwa na uelewa wa kutosha kuhusu sheria, taratibu na mafao yanayotolewa na WCF.


“Tunatarajia waandishi wa habari watakuwa mabalozi wazuri wa kuelimisha wananchi kuhusu umuhimu wa ulinzi wa wafanyakazi na hatua za kuchukua pale ajali au madhara yanapotokea sehemu za kazi,” alisema Kunenge.


Mafunzo hayo pia yamelenga kuwapa washiriki uelewa kuhusu mafao mbalimbali yanayotolewa na WCF ikiwemo matibabu, fidia ya ulemavu, malipo ya wategemezi, msaada wa mazishi pamoja na huduma za utengemao.


Aidha, washiriki wamehimizwa kuwa mabalozi wa elimu ya fidia kwa wafanyakazi katika vyombo vyao vya habari ili kuongeza uelewa kwa jamii kuhusu haki za wafanyakazi na umuhimu wa ulinzi wa kijamii nchini.





Comments

Post a Comment

Popular posts from this blog

RC CHALAMILA AWATAKA WENYEVITI NA WATENDAJI KATA NA MITAA DAR KUSIMAMIA ULINZI NA USALAMA.

-
Image
Mkuu wa Mkoa wa Dar es alaam Mhe Albert Chalamila amewataka wenyeviti wa Serikali za mitaa pamoja na watendaji wa Kata Mitaa Mkoani humo kusimamia ulinzi na usalama kwenye ngazi ya mitaa na kata ili kuhakikisha Mkoa huo unakua Salama bila uwepo wa matukio ya uvunjifu wa amani wakati wote. Akizungumza leo jijini Dar es Salaam katika kikao kazi na Wenyeviti, Watendaji wa Kata na mitaa kilichofanyika kwenye ukumbi wa Diamomd Jubilee RC Chalamila amesema suala la ulinzi na usalama linapaswa kuanzia kwenye ngazi ya mitaa na kata hivyo amewataka viongozi hao wa mitaa kusimamia suala hilo kwani katika baadhi ya mitaa kumekua na matukio ya uvunjifu wa amani. RC Chalamila amewataka viongozi hao ngazi ya Mitaa na Kata kusaidia kutatua changamoto za wananchi na sio wao kuwa ni chanzo cha kuongeza changamoto kwa wananchi ambapo pia ametumia nafasi hiyo kuwataka wenyeviti na watendaji kutambua kuwa mwaka huu ni mwaka wa uchaguzi hivyo waendelee kuhimiza wananchi kuanzia ngazi ya mtaa kushiriki ucha...
Read more

MAHAFALI YA NANE SHULE YA AWALI NA MSINGI SAI YAFANA, WAZAZI WATAKIWA KULEA WATOTO KATIKA MISINGI YA MAADILI MEMA.

-
Image
Na Fidea Masunga,Dar es Salaam. Wazazi na walezi nchini wametakiwa kuhakikisha wanawalea watoto katika misingi ya maadili, nidhamu na hofu ya Mungu ili kujenga kizazi chenye kuzingatia elimu, kuishi maisha ya wema na kuwa viongozi bora wa kesho. Wito huo umetolewa jijini Dar es Salaam na mdau wa elimu  Ramadhan Balle , ambaye alikuwa mgeni rasmi katika mahafali ya nane ya  Shule ya Awali na Msingi Sai  yaliyofanyika Chanika Kidugalo Dar es salaam. Akizungumza kwenye hafla hiyo, Balle alisema malezi bora ya watoto hayapaswi kuishia nyumbani pekee, bali yazingatie misingi ya kiroho kupitia maandiko ya dini kama Biblia na Qur’ani, kwani ndiyo msingi wa kujenga jamii yenye hofu ya Mungu na kuondokana na vitendo vya ukatili na maovu. “Watoto wakilelewa katika msingi wa dini, wanakua na mwelekeo bora, wanajengeka kiakili na kiroho na hivyo kuepuka kujiingiza katika tabia hatarishi. Hili ni jukumu lenu wazazi na walezi,”  alisema Balle. Aidha, aliwataka wazazi kuwekeza zaid...
Read more